Каролина Гочева

БУКЕТ РУЖИ ЗА РОДЕНДЕН





Поп-дивата Каролина Гочева минатата недела во интимно друштво со најдобрите другарки го одбележа својот роденден. На летната тераса во ресторанот “Балканика“ опуштеното женското друштво а ла “Сексот и градот“ слатко се кикотеше и наздравуваше во име на Каролина. Трпезата беше исполнета со специјалитети, а сето тоа убаво залиено со сортно вино. Не можеа да се забележат подароци, а ние од наши извори дознавме дека Каролина не сакала никакви подароци, ниту торта, едноставно јубилејната 30. сакала да ја прослави без многу помпа. Но по половина час во ресторанот влета момче со огромен цветен аранжман, кое неколку минути ја бараше славеничката низ локалот. Откако и го врачи цвеќето, внатре секако имаше и картичка на која пишуваше: “Среќен роденден Каролина“, а под целиот текст стоеше симбол на срце и ништо повеќе. Кој ли и го испрати цвеќето на Керол - остана енигма. Ние само знаеме дека роденденскиот ден завршил во станот на Каролина, девојките го гледале филмот “Бележник“ (Note Book) и цела вечер останале дома.

Најново интервју со Каролина Гочева
Што мисли за Боки 13, што мисли за Слаткар, дали се дрогира, кога ќе излезе албумот, дали му го честита детето на Гроздан?



Каролина Гочева отсекогаш го привлекувала вниманието на јавноста, што со нејзините вокални способности, што со варирањето во тежината, и секако, тука се неизбежните момчиња за кои многумина ја врзуваат. Нејзиниот албум, седми по ред, е веќе готов и официјалната промоција е закажана кон крајот на месецов.


Нема да одиш на концертот на Јелена Карлеуша?
(Се смее)... Јас не ни знам за концертот, а и да знаев, сигурно немаше да отидам. Можеби ќе одам на “Ејсидиси“ во Бугарија.
Мислиш ли дека ти завидуваат колегите, кои исто така беа номинирани за изборот, на пример како Слаткар, Елена, “ДНК“...
Тоа ќе мора нив да си ги прашаш. Јас само знам дека принципот на гласање беше - испраќаш порака за твојот фаворит и тоа е тоа, нема причина некој на некого да му завидува. Да поминеше некој од моите колеги, мене ќе ми беше многу драго.
Кажи ми Каролина, како е Марко Антиќ? До каде сте со вашата тајна врска?
Леле, ме гаѓаш директно во ребро... Јас мислев ќе ме поштедиш за мојот приватен живот, бидејќи подготвувам нов албум, кој ќе има многу добри песни...
Јас знам дека твоите фанови ќе бидат задоволни од албумот, туку кажи ни за Марко?
Значи, не се откажуваш, добро. Вака, кога јас на некој од вас сум му кажала дека имам момче, кое се вика Марко, или Перо, или Станко... Тоа е масло на новинарите! Кога се вратив од одмор, некој веќе имаше напишано дека дечкото ме чекал на плажа со балони, со хеликоптери, чуда! Па луѓето помислија дека се забавувам со Џејмс Бонд!
Немој да ми кажеш дека на Хвар не постоело никакво момче, затоа што ќе ти порасне носот!
Па сега... Имаше додворувачи, тоа е точно (се смее)...
А огромната кошница со цветен аранжман што ти пристигнала во хотелот, од кого беше?
Ти кажувам, имав додворувачи, но немав момче.
ОК, да заклучиме - Марко или Анте постојат?
Аааа, не, не сакам ништо да изјавувам, мудро ќе си молчам, знаеш дека за мојот приватен живот не коментирам.
Што е со “Фејсбук“? Таму стои дека си во врска со Марко?
На профилот на кој си ми и ти пријател, комуницирам само со блиските луѓе. Имам и други два профили, кои се отворени за моите фанови. Тие што ме познаваат знаат дека тоа што јас го правам на мојот профил се повеќе интерни шеги, така што...
Добро, значи Марко е измислен?
Па дури и да сум го измислила, доколку тоа ми го олеснува мојот живот, зошто би ми забележал, нели?
Зошто не направи голема роденденска журка за твојот 30-ти роденден?
Јас никогаш не сум го славела мојот роденден, не сакам, немам потреба. Роденденот може да биде нешто интимно, но еве гледам дека вашиот папарацо-фотограф не уловил во “Балканика“ (се смее)... Ете како изгледа еден мој роденден.
Како течат подготовките за новиот албум?
Албумот е завршен и сега е во фаза на ремикс, за неколку дена правам фотосесија за неговите корици.
Да очекуваме нешто провокативно?
Секако (се смее)... Фотографиите ќе бидат многу интересни и уметнички.
Колку си ти задоволна од твоето седмо чедо?
Ми се допаѓа кога албумите ми ги нарекуваш чеда (се смее)... Јас сум презадоволна, сите песни некако си го најдоа својот пат до мене, првпат не се планираше од кои автори ќе се земаат песни, имавме доста време, па затоа мислам дека имам одличен избор на материјали.
Која нумера ќе биде носечка, како ќе се вика албумот?
Уште не знам, ќе го преслушаме уште еднаш, па ќе одлучиме. Нареден сингл ќе биде “Не се враќаш“ или “Више се невраќаш“, за кој вие го објавивте текстот.
Значи, на 29 мај промоција?
Се уште не е дефинирано, но тука е за ден-два.
Мислиш ли дека на пејачките им доликува да се расправаат на фејсбук-профилите или пак да се препукуваат со колегите во соблекувални?
Тоа зависи од карактерот на личноста. Јас никогаш не сум се впуштала во конфликтни ситуации. Свесна сум дека не може сите да ме сакаат. Безпредметно е да се расправаш со сите што ќе кажат нешто за тебе. Јас не ги осудувам, но мојот начин на решавање на работите е многу поинаков.
Народот кога те “консумира“ преку ТВ-екраните, најчесто знае за тебе да каже си студен човек, вообразен... Од каде ваквото мислење за тебе?
Не се согласувам со тоа, мислам дека имам искрен однос со публиката. Јас секогаш го кажувам она што го мислам и можеби тука е проблемот, не знам да бидам дволична. Каква сум-таква сум, имам лоши денови кога не ми се прави муабет со никој, всушност како секој жив човек.
Како ти се гледа естрадава, до каде сте стигнале?
Јас никако не можам да разберам што се случува на нашава естрада. Сите се чесни, немаат момчиња, сите се невини... Па јас дури себеси се сметам за глупава што сум ви пријавила две-три момчиња, но нема да ја повторам истата грешка...
Досега двапати ја претставуваше нашава земја на “Евровизија“, па според тебе, дали Ѓоко Таневски ќе влезе во финалето?
Јас би сакала и имам огромна желба да влезе, исто како што и минатата година навивав “Некст тајм“ да влезат во финалето. На ХЃокоХ му ја посакувам целата среќа, затоа што тој е одличен вокал и супер лик и се надевам дека ќе направи многу, и покрај тоа што МРТВ повторно ништо не финансира.
Дури и видеото го изработи “Томато продукција“.
Добро е што зад Ѓоко застана продукција како “Томато“. Мене лично ми се допаѓа спотот, има интересна приказна и совршено изгледа.
До каде се преговорите со Слаткар, наслушнав дека подготвувате дует?
Слаткар е музичар кој многу ветува, но јас за дуетот не знам ништо, но можеби имало некои преговори од страна на моите и на неговите луѓе.
Што мислиш за Боки 13?
Се најдобро, јас оддамна го познавам Боки и навистина ми е драг лик. Тој е каков што е, драго ми е што по “Големиот брат“ повеќето луѓе сфатија дека е навистина добро момче, кое сето тоа што го прави е во име на шоубизнисот, и верувајте, тој знае како се прави.
Знаеш ли дека го откажа концертот?
Па добро, сигурно имал добра причина за тоа.
На интернет кога и да се постави некоја фотографија од тебе, има многу коментари од типот дека си болна, дека се дрогираш, па затоа си толку слаба... Има ли вистина во некој од нив?
Се дрогирам, редовно (се смее)... Таа приказна ми е најсмешна досега, јас во мојот живот не сум пробала никакви наркотици, а и не ни помислувам на тоа. Не се дебелеам само поради тоа што јадам кога сум гладна, пијам доста течности... Луѓето веднаш го помислуваат негативното - ако си слаба, зошто си, а ако се поправиш - дебела си, но јас не живеам за другите.
Размислуваш за брак?
Медиумите досега двапати ме омажија, а јас не сум размислувала сериозно за брак, не затоа што не сакам, туку едноставно сакам да се омажам само од чиста и вистинска љубов. Најголема желба ми е да имам семејство и две деца, а во денешно време вистинско волшебство е да си го зачуваш бракот.
Колку години постоиш на естрадата?
Ако сметам од мојата 11-та годишна возраст, речиси 20 години... Еее, 20 години (се смее)...
Не тезгариш како твоите колеги, те нема во дискотеки, не се потиш, немаш тезги, па од што живееш?
Јас егзистирам од музиката, добро, тука се спонзорствата што одат преку “Авалон“, можеби не настапувам често, но мојот настап има висока цена. Не се преценувам, но си ги знам квалитетите, зад мене стои цел тим и глупаво ќе биде да се појавувам во која било дискотека или клуб.
На себе немаш “пластика“?
Немам, но не значи дека нема да ставам (се смее)... Понекогаш размислувам на таа тема. Еден ден ќе посакам пополна усна, утре сакам гради, задутре јаболчници, па не сакам ништо, и така никако да се наканам. Еве, кога носам некој фустан, ми недостасуваат гради (се смее)... Задоволна сум со себе, а и момчињата ваква ме сакаат (се смее)...
Кога сме кај момчињата, знаеш дека твоето екс-момче Гроздан доби син Коста и тоа токму на твојот роденден? Му честиташе ли?
Да, знам, и секако дека му честитав. Нека му е жив и здрав синот, но иако станува збор за чиста коинциденција, сепак поубав ден не можел да избере (се смее)...

Кaролина повторно вљубена!


На нашата поп-принцеза Каролина Гочева мора да и доделиме Оскар! Се прашувате зошто, еве ви го одговорот - за успешно мафтање на јавноста во врска со нејзиниот љубовен живот. Но да разјасниме уште на самиот старт - таа нема никаква вина што ние паднавме на нејзината финта, девојчето само мудро си молчеше, додека ние низ Балканов го баравме фамозниот Марко Антиќ. Но за волја на вистината, тој не постои, а Гочева можеби не директно, но меѓу редови, тоа го призна во интервјуто за “Свет“, во кое изјави: “Во виртуелниот свет можам да правам што сакам, па дури и да имам измислени дечковци“.
Но поинтересни се муабетите што во последно време кружат низ скопската чаршија. Имено, во изминативе три недели наголемо се зборува дека новата љубов на убавата Каролина е Јован Пановски. Дечкото е доста познат во елитните скопски кругови, а пред некое време го поврзуваа и со водителката Ивана Хаџиевска. Неговата фамилија е сопственик на аптеките “Пановски“, а со Каролинче почнале интензивно да се дружат во изминатиoв месец. Во почетокот контактирале само преку СМС-пораки и преку популарниот “Фејсбук“, а подоцна и во друштво на своите заеднички пријатели често можеле да се видат во не толку експлотираните кафулиња. Инаку, тие се познаваат уште многу оддамна. Јован бил близок пријател со бившото момче на Каролина, Дино, па почетоците на нивното познанство датираат уште оттогаш. Но во тоа време меѓу нив немало таков вид на симпатии, кои очигледно се родиле подоцна. Воедно, можеби тоа е една од причините поради кои двојката не сака да се “промовира“ во јавноста. Нивните тајни и блиски дружби за време на ретките ноќни излегувања во скопските кафулиња предизвикаа луѓето да почнат да се прашуваат што се случува меѓу нив. Но, рака на срце, никогаш немаат излезено сами, задолжително со нив се другарките на Каролина, кои се трудат се да биде под контрола. Но ни тие не можат да ги сокријат искрите меѓу пејачката и Јован.
Кога ја дознавме информацијата, планиравме да ја контактираме пејачката, но таа значително ни ја олесни работата. Имено, пред неколку дена, Каролина пристигна во “Метрополис арена“, каде што настапуваше популарниот Дејвид Гета, токму во друштво на Јован. Инкогнито, двајцата сами влегоа преку ВИП-влезот и се сместија во ложата, па нашата потрага по интересни фотографии започнаа токму тука. Но пејачката со долги нозе не е од вчера, таа добро се има навикнато на блицот од апаратот, па во моментот кога тој светна, таа и Јован експресно се разделија, а нашата фотка остана празна. Иако изненадена, таа се доближи до нас и на шега не праша дали ни се добри фотките, на што ние и одговоривме дека ако останаа уште 1 минута заедно, ќе беа многу подобри. За жал, бидејќи новопечената двојка не забележа, нашиот фотограф не успеа да ги сними и покрај нашето понатамошно инсистирање. Сепак според реакцијата и на Каролина и на Јован, секој ќе заклучи дека тука има нешто повеќе од пријателство. Иако не ја прашавме за одговор, Каролина сама наивно се оправда дека знае дека веќе некое време кружат муабети дека таа и Јован се повеќе од пријатели, но тоа не било точно. Во еден момент Јован и се доближи, прашувајќи ја на шега дали ќе се бакнат или не за да ги сликаме, на што Каролина само се насмевна. Воедно, како што дознаваме од нашиот извор, кој е близок до двојката, тие овој викенд планираат со своите најблиски пријатели да заминат на 4 дневен одмор во Грција, во местото Порто Карас. Таму нема да мора да се кријат и да бегаат од папараци, на раат ќе си шепотат на увце, а не како на “Фејсбук“ преку трети лица, се со цел да не бидат откриени.
Како и да е, ние ја охрабруваме Каролина новиот дечко да и го претстави на јавноста, барем таа немала проблем со тоа, а и не страда од комплекси дека не се достојни да стојат рамо до рамо со неа. А и се надеваме дека овојпат токму со Јован ќе ги оствари своите соништа и ќе застане на лудиот камен. Но се во свое време, трпеливи сме ние, па ќе почекаме.