BINBIR GECE, Kanal D|2006-2009

Феноменот Шехерезад ги руши рекордите на Жаде и на Касандра

Идните бизнисмени сакале фирмите да си ги наречат „Шехерезад“, но тој назив не може да се користи. Многумина биле заинтересирани да ги крстат и „Бинјапи холдинг“, но според правилата на Централниот регистар, само една фирма може да се вика така. Млади бизнисмени веќе го искористиле ова име
Популарната серија „1.001 ноќ“ не е занимација само за домаќинките и за пензионерите. Таа ги инспирира и македонските бизнисмени, кои почнаа и своите фирми да ги регистрираат според ликови и имиња на компании во серијата. Во Централниот регистар неодамна било запишано друштво со ограничена одговорност со име „Бинјапи холдинг“, името на местото на кое работи популарната Шехерезад во серијата. Таму раскажуваат дека идни бизнисмени почнале да ги нарекуваат фирмите според серијата.

Во регистарот прашувале и дали е зафатен и називот „Шехерезад и Онур“, а регистрирале и друштво „Керемоглу“, според лик од серијата.

Стојан Костадиновски и Илија Стојановски, 25-годишни сопственици на друштвото „Бинјапи холдинг“, кое го регистрирале пред истекот на минатиот месец, раскажуваат дека се одлучиле за ваков назив гледајќи епизода од серијата. Тие веќе работат со сателитска и телекомуникациска опрема и, велат, се надеваат дека фирмата ќе им биде успешна како онаа во серијата.

- Ние подолго време се обидувавме да смислиме име на фирмата и не ни одеше. Сите што ни текнуваа беа зафатени. Гледајќи ја серијата си реков зошто и нашата фирма да не се вика како онаа во серијата. Проверивме и не беше зафатено името. Можеби тоа е знак и ќе имаме среќа колку што е популарна серијата. Ние сме двајца другари, многу подобри од оние во серијата, сопственици на нивната фирма - изјави Костадиновски.

„Керимоглу“ е името на уште едно друштво, регистрирано месецов, за чиј назив сопственикот Шериф Мифтар добил инспирација исто така од серијата. Керим во серијата е ортакот на Онур, кој е вљубен во убавата Шехерезад. Сопственикот на фирмата во Македонија ќе работи со трговија, превоз и услуги.

- Ја гледам серијата и морам да признаам дека имаше малку влијание ликот по кого ја именував фирмата. Но и татко ми се викаше Керим, а „оглу“ на турски јазик значи „син“ - низ смеа ни кажа Мифтар.
Вработените во Централниот регистар раскажуваат дека идни бизнисмени прашувале дали веќе се запишани фирми наречени според други ликови во серијата. Сепак најмногу се интересирале за називот Шехерезад, кој не може да се употребува, зашто веќе има фирма со слично име. Правилата на регистарот велат дека називите треба да се разликуваат најмалку со три букви. Тие велат дека имало повеќе заинтересирани и за називот „Бинјапи холдинг“, но само една фирма може да се вика така.
- Според членот 56 од Законот за трговски друштва, новите фирми на трговските друштва треба јасно да се разликуваат од сите дотогаш запишани во трговскиот регистар. Доколку е испочитувано тоа, ние немаме никаков проблем околу називот на фирмата. За тоа како ќе се вика одлучуваат оние што ја регистрираат - вели Емил Јакимовски, портпарол во Централниот регистар.

СЕРИЈАТА „1001 НОЌ“ ГИ УРНА СИТЕ РЕКОРДИ ВО ГЛЕДАНОСТ

Шехерезад го растури фудбалот

Турската серија „1001 ноќ“ што се емитува на телевизија А1 ги урна сите рекорди во гледаност, оставајќи ги далеку зад себе дури и фудбалските натпревари на Премиер-лигата. Народот наголемо го фаќа вистинска шехерезадна треска, од најмладо до најстаро. Наставници им задаваат на учениците писмени теми за серијата, учениците лудуваат по рингтонови со нејзината музика, дијалозите меѓу Онур и неговата љубена се прераскажуваат по канцеларии, а досетливите трговци бараат разни начини да профитираат од суперпопуларните ликови. Прашање на време е кога првите Шехерезад и Онур ќе бидат внесени во македонската матича книга на родени. Социолозите и културолозите велат дека тајната на успехот на оваа серија се крие во едноставната и топла љубовна приказна, проткаена со традиционален морал, а сместена во европеизиран и гламурозен амбиент. Нејзината популарност во Македонија е резултат на блискоста на менталитетите, како и одлуката на телевизија А1 да ја натсинхронизира серијата, што е реткост кај нас, а за што долго време постоеја предрасуди. Сето заедно ја прави серијата вистински блокбастер, правејќи го терминот кога таа се емитува најнепријатно време за гости, и оставајќи ги празни улиците и парковите. Во едно скопско училиште наставничка побарала децата да си одберат имиња од серијата „1001 ноќ“ и да ја глумат приказната. Нејзина колешка, наставничка по историја, им барала на петоодделенците да и раскажат што се случувало во епизодата што таа ја пропуштила. Серијата предизвикува и кавги меѓу сопружниците. - Не му давам на маж ми да гледа фудбал кога е Шехерезад, нема шанси! Едно време се бунеше, ама сега и тој не пропушта епизода - вели една млада мајка. Може да се помисли дека токму поради овие „спорови“ за далечинското, фудбалските натпревари губат од гледаноста, но интересно е дека фудбалот многу помалку се гледа дури и во термините кога се репризираат епизодите од „1001 ноќ“. Младата скопјанка објаснува дека предвреме ги знае дејството и епилогот, затоа што речиси сите нејзини колеги од факултетот веќе ги изгледале сите епизоди, кои ги симнале од бугарски сајтови на интернет, каде што, исто така, биле синхронизирани. Манијата од „1001 ноќ“ влегува и во стопанскиот живот. Некој млад бизнисмен деновиве побарал во суд својата фирма да ја регистрира под име „Шехерезад и Онур“, а друга како „Бинјапи холдинг“. Досетливи пазарџии веќе продаваат ролки „Шехерезад“ и велат дека одат како алва. Меѓу тинејџерите секогаш главен муабет е како била облечена Шехерезад, а како Онур, па на трговците им се случува да им бараат парчиња облека како нивните. Лекари велат дека се случувало стари луѓе да дојдат во ординација, растревожени од драматичните заплети во серијата, и да побараат да им се провери притисокот и работата на срцето. Според психолозите, токму таа емпатија со ликовите и широкиот генерациски контекст се главна причина за нејзината популарност. - Серијата навистина поттикнува лавина од сентиментални чувства, што од психолошки аспект ја зголемува нејзината популарност. Друга компонента е комбинацијата од убавина, моќ и надеж, што очигледно им недостига на граѓаните на земјава, па ја прифаќаат како душевна храна - вели аналитичарот Ризван Сулејмани. „Шехерезад“ им е мелем за душата - укажува професор д-р Илија Ацески. Според него, социопсихолошката функција на серијата е надминување на современото отуѓување меѓу луѓето, кои се внесуваат во улогите. - Тоа е приказна која час и половина ги одвојува од реалноста, кога забораваат на проблемите - констатира социологот Ацески.

табела на гледаност

Шехерезад 36% Олимпик - Реал М. 3%
Шехерезад 35% Интер - Рубин Казан 2,9%
Шехерезад (реприза) 19,49% Арсенал - Челзи 8,6%
Шехерезад (реприза) 19,49% Манчестер С. - Челзи 8,6%


Фудбалот губи со 10:0

Според резултатите од мерењата на гледаноста, Шехерезад, со 36 проценти, повеќе од десетпати ја надминала гледаноста од само три проценти на вторничкиот натпревар меѓу Олимпик и Реал Мадрид. Во средата гледаноста на серијата била 35 отсто, а на натпреварот Интер и Рубин Казан само 2,9.
Најинтересни се податоците за гледаноста од 19,49 проценти на репризното издание на Шехерезад, споредени со 8,6 проценти од гледаноста на фудбалските дуели меѓу Челзи и Арсенал и меѓу Манчестер Сити и Челзи од англиската Премиер-лига, што директно се пренесуваа минатите два викенда. Редовни посетители на обложилниците велат дека дури и таму се повеќе се гледа Шехерезад наместо фудбал.