ALCANZAR UNA ESTRELLA II, Televisa|1991

Една година по неверојатниот успех на "Досегнувајќи ѕвезда", продуцентите решија да снимат и втор дел од истата приказна. Оваа новела е поразлична од другите до тогаш затоа што за прв пат млади актери стануваат дел од актерската екипа, за прв пат се обработуваат тинејџерки проблеми и за прв пат музиката добива значајно место во една теленовела. Музичката група "Кукли од хартија" која е дел од серијата стана мегапопуларна и вон серијата кога имаа многу концерти низ цела Латинска Америка, а издадоа и свој диск. Во таа група учествуваа Рики Мартин, Анхелика Ривера, Биби Гејтан, Педро Фернандез, Ерик Рубин и Саша Сокол кои земаа учество во новелата, која им го отвори патот да се докажат и на музичкото поле. Серијата достигна голем успех како и првиот дел, промовирајќи за тоа и за денешно време многу големи ѕвезди. По серијата и музичката слава на групата, Рики Мартин стана интернационална музичка ѕвезда, Биби Гејтан стана позната актерка и секс симбол во Мексико, а на Анхелика Ривера и беа отворени вратите за следните години да се покаже како главна протагонистка во други серии на Телевиса.


ДОСЕГНУВАЈЌИ ЅВЕЗДА 2 – ALCANZAR UNA ESTRELLA II
Период на прикажување: 21 јануари 1991 – 24 мај 1991
Епизоди: 90


Едуардо Касабланка упатува јавен повик во Мексико до сите млади и надежни музички таленти со цел да се најдат вистинските личности кои ќе бидат дел од групата која сака да ја формира и да ја наслови Кукли од хартија. Во последен момент, Едуардо ја прекинува таа акција и аудиција за да оди на турнеја со неговата сакана Лорена во Европа. Шест млади личности кои се дел од тие аудиции решаваат да продолжат напред и да бидат дел од таа група, и покрај тоа што Едуардо нема да може да ја контролира нивната работа.
Така Џесика, Силвана, Маримар, Пабло, Хорхе и Мигел Анхел стануваат дел од таа група, започнуваат со својата музичка кариера и за кратко време се здобиваат со големи успеси во многу латино земји. Но и покрај професионалната нишка која ги поврзува, помеѓу младите се појавуваат и симпатии, љубов и сплетки, започнуваат да се соочуваат со многу препреки во секојдневието. Џесика и Пабло се вљубуваат, но братот на Пабло застанува на патот на нивната среќа во врската затоа што е вљубен во Џесика. Маримар живее со својата себична мајка која ја обвинува поради тоа што е ѕвезда, а Хорхе е тој што се вљубува во Маримар и ја подржува. Силвана сонува еден ден да ја напушти групата и да продолжи со соло кариера, а таа желба решава да ја претвори во стварност откако дознава дека нејзиниот вистински татко е еден познат музчки продуцент. Мигел Анхел живее меѓу животот и смртта, борејќи се со страшна болест, а неговиот лик докажува дека некогаш големите успеси резултираат со фатален крај.


Улоги: Саша Сокол (Џесика), Педро Фернандез (Хорхе), Ерик Рубин (Мигел Анхел), Анхелика Ривера (Силвана), Биби Гејтан (Маримар), Рики Мартин (Пабло)