VELO DE NOVIA, Televisa|2003

Невестински превез е мексиканска романтична теленовела со Едуардо Сантамарина и Сузана Гонзалес, кои беа партнери и во серијата, но и во приватниот живот. Серијата е дело на Хуан Осорио Ортиз, кој и за оваа серија подготви режија на едно чудно и апсурдно сценарио за љубовта, животот и смртта.


Невестински превез – Velo de novia, de corazon a corazon
Земја на потекло: Мексико
Година: 2003
Епизоди: 135


Андреа Паз е преубава млада жена, со многу волја за животот, но за жал има срцева маана. Живее со својата завидлива сестра и својот татко Филемон, кој го крие минатото за вистинската мајка на Андреа. Андреа работи како дизајнерка и моментално го дизајнира венчалниот фустан за амбициозната и посесивна Ракела Виласењор, која треба да се мажи за богатиот Хосе Мануел дел Аламо. Но, по се изгледа таа венчаница нема да ја носи Ракела, затоа што Хосе Мануел е вљубен во Анхелес, сестрата на Ракела. Милата и невина Анхелес го сака Хосе Мануел, но се плаши затоа што таа љубов е забранета. Сосема случајно Анхелес загинува во сообраќајна несреќа, а истовремено Андреа добива инфаркт и е на работ на смртта. Во болницата, за да го спасат животот на Андреа, лекарите го пресадуваат срцето на Анхелес во Андреа. По смртта на саканата, Хосе Мануел е несреќен и огорчен, се до моментот кога ќе ја запознае Андреа, не знаејќи дека таа е личноста која го има срцето на Анхелес. Андреа и Хосе Мануел ќе мора со сите сили да се борат за својата љубов, најмногу против злобната Ракела (која не може да го препушти Хосе Мануел на друга), таткото на Ракела-Асаел (кој ја мрази жената која го зела срцето на неговата мртва ќерка) и против доња Рикарда (мајката на Хосе Мануел, која не ја сака сиромашната Андреа за снаа). Првиот дел за невестинскиот превез на Андреа не завршува убаво. На самата венчавка на Андреа и Хосе Мануел, доаѓа Рикарда и го убива сопствениот син, наместо Андреа. По смртта на Хосе Мануел, несреќната и разочарана Андреа одлучува да се пресели во Мексико Сити со својата мајка која ја пронајде по толку години, својата полусестра и пријателката Вида. Таму започнува да студира медицина и се вработува како медицинска сестра во болница. Ракела, нејзината голема непријателка исто така се сели во Мексико Сити кај својата злобна тетка Енрикета дел Морал и братучедот Артуро. Таму Ракела се запознава со Хорхе Роблето, кој е идентичен на Хосе Мануел, се вљубува во него и двајцата стануваат пар. Еден ден, откако се враќа од работа, Хорхе ја запознава Андреа и се вљубува вистински во неа, а Андреа не може да поверува дека Хорхе е двојник на нејзината најголема љубов. Во Андреа се вљубува и Артуро, но срцето на Андреа постепено сфаќа дека му припаѓа на Хорхе, иако самата си вети дека никогаш нема повторно да сака како што сакала. Ракела дознава дека Андреа повторно е на прагот да и го земе свршеникот, па затоа се здружува со својот братучед Артуро за да ги разделат вљубените Хорхе и Андреа. Андреа повторно ќе поминува низ пекол на лаги, интриги и препреки, поставени од Ракела, Артуро и таткото на Ракела, но нејзината љубов кон Хорхе е посилна од се. Артуро цело време и се наметнува и ја прогонува Андреа се до моментот кога во самоодбрана ќе биде убиен од Андреа, која ќе го попречи да ја силува...Тогаш Андреа е уапсена и пратена во затвор, каде завршува и нејзината непријателка Ракела. Доња Енрикета ќе се бори да ја осудат Андреа, но Андреа до самиот крај ќе има целосна љубов и подршка од Хорхе, мајка и, Вида и пријателите за да на крајот конечно го стави невестинскиот превез пред олтар и биде среќна.

Улоги: Сузана Гонзалес, Едуардо Сантамарина, Синтија Клитбо, Елизабет Алварез, Лилиа Арагон, Серхио Аркета, Рајмондо Капетиљо, Ниурка