AMAR OTRA VEZ, Televisa|2003

Повторно вљубени – Amar otra vez
Земја на потекло: Мексико
Година: 2003
Епизоди: 110

Повторно вљубени е мексиканска теленовела од Телевиса, снимена во 2003 година. Насловната песна Hoy (Сега) ја пее познатата Глорија Естефан, а за мексиканската шпица, насловната нумера ја исполнува Енрике Иглезијас. Серијата не постигна голем успех низ светот, а кај нас се прикажуваше во утринскиот термин на А1 телевизија.
Младата и сиромашна девојка Росио Хуертес заработува за живот, шиејќи фустани и венчаници на своите пријатели низ градот, а додека го прави тоа, сонува еден ден да се омажи за своето момче Фернандо, кој отсекогаш го сакала. Фернандо е син на сиромашната добродушна Балбина, која живее во скромен крај, полн со топлина и љубов, а Балбина ја одгледала и Росио кога останала сираче, па така најголема желба е нејзината поќерка и нејзиниот син еден ден да се венчаат. Но, Фернандо смета дека не е роден да биде сиромашен и вечно да живее во беда, па на прво место радо би ги ставил парите наместо љубовта. На денот на венчавката со Росио, ја исценира сопствената смрт за да не се ожени со Росио, оставајќи ја сама и депримирана пред олтар. Росио и Балбина се преселуваат во домот на дон Мануел, кој живее со своите чудни ќерки Моли и Џенет. А пак Фернандо се жени со богатата и арогантна Бренда Монтеро, ќерка на неговиот богат шеф Гиљермо Монтеро, па така доаѓа да живее во богатата куќа на Бренда. Со текот на времето, Росио го запознава младиот Даниел Суарез и се вљубува во него. Меѓу нивната среќа сега стојат сплетките на бившата свршеница на Даниел, злобната и амбициозна Вероника која ќе прави се за да го задржи Даниел за себе и ќе го лаже дека чека негово дете. Вероника е воедно љубовница на Гиљермо, кој пак е вистинскиот татко на Даниел, кој го оставил како мал кога ја напуштил неговата мајка Есперанса. Во потрага по подобар живот и средства да се преживее, Росио се вработува како слугинка во домот на дон Гиљермо и така открива дека Фернандо е жив. По шокантната тајна, ни Балбина, ни Бренда, па ни самата Росио не се во состојба да му простат на Фернандо. Фернандо се разведува од Бренда, останува во инвалидска количка по една несреќа и е подготвен на се за Росио да му ја прости измамата. Росио сега ќе мора да бира меѓу Фернандо, кој вистински се кае и меѓу Даниел, кој вистински и го освои срцето...Одлуката не е лесна, затоа што и за тројцата ова е шанса да бидат повторно вљубени...

Улоги: Иран Кастиљо, Валентино Ланус, Рафаел Амаја, Маргарира Магања, Ванеса Гузман, Анхелика Мариа, Гиљермо Гарсија Канту, Нурија Багес