ABRAZAME MUY FUERTE, Televisa|2000

Прегрни ме цврсто е популарна мексиканска теленовела, снимена во 2000 година, режирана од Салвадор Мехиа Алехандре, а во главните улоги настапуваа најпознатиот латино актер Фернандо Колунга и пејачката Арасели Арамбула. Серијата е римејк на теленовелата Смртен грев од 1960 година каде познатиот и веќе покоен режисер Ернесто Алонсо ја толкуваше главната улога. Ова беше последната теленовела на актерот и писател Рене Муњоз кој почина од рак во мај 2000 година, а настапи во епизодна улога во почетокот на серијата. И покрај тоа што серијата достигна огромна гледаност во Мексико, низ светот и на Балканот, сепак заслужено си доби и негативни критики поради апсурдноста на поедини делови од фабулата на настаните, како што е смртта на Хозе Марија, кој умира од љубов, а неговиот лик го толкува пејачот и актер Пабло Монтеро.


ПРЕГРНИ МЕ ЦВРСТО - ABRAZAME MUY FUERTE
Година: 2000
Епизоди: 135


Кристина е млада и нежна девојка, која сите ја сакаат на преубавиот имот Ел Платанал, сопственост на нејзиниот татко дон Северијано Алварез, карактерен и самоволен сопственик. Кристина е во тајна врска со надзорникот на имотот, убавиот и племенит Диего Ернандез, на кој целосно му се предава бидејќи неизмерно го сака. Еден ден Кристина му признава на татка си дека носи дете од Диего. Северијано не може да ја дозволи таа врска на ќерка му со некој си сиромашен, па затоа ја праќа Кристина во градот да се породи со нејзината слугинка Ракела, а пак соседот Федерико Ривера, злобен и крут човек ја користи стуацијата и му предлага на Северијано да ја земе одговорноста и да ја исчисти честа на Кристина, така што ќе се омажи со неа. Така, новородената ќерка на Кристина, Марија дел Кармен завршува како ќерка на Ракела, а Кристина ќе мора да се задоволи со тоа да биде нејзина кума доколку сака девојчето да остане на хациендата. Федерико се жени со Кристина, ги убива Северијано и Диего, предизвикува несреќа во која Кристина го губи видот и така завршува како сопственик на целото нејзино богатство. По многу години, Кристина е слепа и живее во несреќен брак, а Марија дел Кармен е миленичка на сите на имотот, ужива големи привилегии од Кристина, се школува, но единствено не и е е јасно зашто нејзината мајка Ракела се однесува лошо со неа. Кристина е постојано уценувана од Федерико и Ракела ако и ја каже вистината на Марија дел Кармен, па затоа и Кристина живее во постојан страв и желба да и биде мајка на Марија, а не кума. Во Марија е вљубен скромниот Хозе Марија, работник на имотот, но Марија не може да му ги возврати чувствата. Марија дел Кармен силно се вљубува во Карлос Мануел, внук на дон Федерико, кој се враќа од странство по завршените студии по медицина. Карлос Мануел е многу поразличен од својот чичко, тој е добар и благороден, а на имотот, доаѓа со својата свршеница Дебора Фалкон. Со текот на времето, и Карлос Мануел се вљубува во Марија дел Кармен, но постојано меѓу нив ќе застанува Дебора, која го изневерува Карлос со неговиот чичко Федерико. Понатаму во серијата, Федерико станува опседнат не само од Кристина, туку и од Марија дел Кармен, која за него чувствува само татковски чувства. Федерико сфаќа дека оние кои треба да ги раздели се Марија дел Кармен и Карлос Мануел, а во тој план на страшни сплетки и лаги му помага Дебора. Фeдерико ги убива сите оние кои ќе ги откриваат неговите злобни намери, сите мажи кои ќе и се доближат на Кристина, како што е на пример докторот Роблес кој на Кристина ќе и го врати видот. Приказна полна со љубов и омраза, сплетки и убиства, со една тајна која ја крие мајката за да не и биде повредено детето, приказна за чистите емоции, за искрената љубов која може да се почувствува само кога љубениот ќе каже Прегрни ме цврсто.

Улоги: Арасели Арамбула, Фернандо Колунга, Викторија Руфо, Цезар Евора, Освалдо Риос, Пабло Монтеро, Росана Сан Хуан, Алисија Родригез, Арналдо Андре, Хоакин Кордеро, Лилиа Арагон, Рене Касадос, Тина Риверо