Шесте актери кои се прославија со улогите во хит серијата "Пријатели" се согласија да ја снимат филмската верзија на популарната серија. На таа одлука ги поттикна огромниот успех на "Сексот и градот" чие второ продолжение моментално се снима.
По последното снимање во 2004 година, на ист сет повторно ќе се најдат Џенифер Анистон, Кортни Кокс, Метју Пери, Мет Лебланк, Лиса Кадроу и Дејвид Швимер.

Одговорните лица од студиото "Warner Bros" наводно им платиле цело богатство на ѕвездите кои за последната, десетта по ред сезона на "Пријатели" добиваа рекордни износи по епизода. Сценариото ќе го напишат авторите на серијата Дејвид Крејн и Марта Кауфман, а во кината филмот ќе почне да се прикажува летото 2011 година.

Џејсон Мајкл Тајлер кој го глуми Гантер, сопственикот на кафулето "Central Perk", прв ја потврди информацијата. "Дефинитивно ќе го снимиме филмот. Сеуште сум во контакт со голем дел од членовите на екипата и сите го чекаат почетокот на снимањето", пренесува "Daily Mail".

Филмот секако добро ќе им дојде на најголемиот број на актери од серијата, кои после нејзиното завршување не доживеаа значаен успех.

Единствен исклучок е Џенифер Анистон, чија кариера е во полн ек и е една од најдобро платените актерки во Холивуд.

Извор: За Забава