Каролина Гочева ќе ја има својата прва актерска улога во серијата "Жените од Дедиње", која ќе ја работи познатата српска продуцентска куќа "Емоушн". На поп-ѕвездата и е понудена интересна улога во приказната која ќе го следи животот на четири жени кои живеат во високото белградско општество. Серијата е комбинација на драма, романса и комедија и ќе наликува на популарните американски серии "Сексот и градот" и "Очајни домаќинки".
Минатата недела, Каролина и "Авалон" продукција потпишаа договор со продуцентската куќа "Емоушн" за соработка на српскиот пазар околу следните проекти на пејачката. "Емоушн" преку својата продуцентска куќа "Мелоди мјузик", ќе биде одговорен за издавањето на новиот албум на Каролина во Србија. Концертната агенција "Шоу мастер", која е, исто така, во сопственост на "Емоушн", во копродукција со "Авалон" ќе се грижи за концертите на Каролина во Србија во наредните 2 години. Во центарот "Сава", својот прв концерт поп-ѕвездата ќе го одржи во 2010 година. За српската јавност, тимот на Каролина одржа прес-конференција во управната зграда на деловниот центар Ушќе во Белград минатата недела.
В четврток ќе се снима спот за песната "Заборави", која Каролина ја испеа во дует со членовите на "Операција триумф" бендот. Спотот ќе го режира Зли, кој соработуваше со Каролина во песната "Ќе се сретнеме повторно" (Срешќемо се опет).
"Емоушн" во јавноста е позната како продуцент на проектите "Сe за љубов", "Операција триумф", "Големиот брат", "Менувам жена" "48 часа свадба"...