„Макфест“ сепак ќе има - стои во новото соопштение испратено од општина Штип. Ова доаѓа по само еден ден откако А1 Телевизија се понуди финансиски да го поддржи Фестивалот на забавни мелодии „Макфест“.

Во официјалното соопштение се вели дека по разговорите помеѓу градоначалникот на Штип Зоран Алексов и директорот на „Макфест“ Стојан Троицки, се наѕира решение за да не се прекине долгогодишната традиција на Фестивалот.

Доколку Општината реши да влезе во организација, односно Советот на Општината во Штип ја поддржи идејата на градоначалникот Алексов да се занимава со организација и финансирање на „Макфест“, тогаш можно е Фестивалот да се одржи на 5, 6 и 7 ноември, стои во соопштението на општина Штип.

Пред само три дена директорот на фестивалот Стојан Троицки изјави дека оваа година нема да се одржи „Макфест“.

„Заради општо познати економско-финансиски состојби во земјава, фестивалот „Макфест“ не успеа да ја затвори потребната финансиска конструкција. Поради тие причини, Фестивалот на забавни мелодии „Макфест 2009“ нема да ја одржи фестивалската приредба во форма и облик во која се одржуваше изминатите 23 години“, рече Троицки.

Веста за неодржувањето на најпознатиот фестивал на забавни мелодии ја шокираше македонската јавност.

По објавената информација бројни беа негативните коментарите, но и многу пејачи останаа разочарани.

Оваа информација доаѓа по само еден ден, откако А1 Телевизија јавно се понуди да го поддржи финансиски фестивалот на забавни мелодии „Макфест“.

Извор: a1.com.mk