Подготовките за концертот на кралицата на поп музиката Мадона во Белград се при крај, се наведува на веб страната на фестивалот „Егзит“.

На подготовките за концертот кој е дел од нејзината светска турнеја, а ќе се одржи на 24 август на Ушче, работат повеќе од 70 врвни професионалци. Со неа на сцената ќе настапат 26 изведувачи меѓу кои 15 танчери, тројца гитаристи, тапанари, виолинисти, како и светски познатиот диџеј Пол Окенфолд.

На првите девет концерти од овогодинешното продолжување на нејзината голема светска турнеја присуствуваа 316.553 посетители, додека минатогодишниот дел од турнејата го посетија 2.337.308 обожаватели на 58 концерти во 17 земји низ светот.

Најрелевантната публикација во музичката индустрија, американскиот магазин „Полстар“ на почетокот на оваа година објави листа според која нејзината светска турнеја наречена „Sticky & Sweet“ во 2009 година е на прво место со заработка од 281,6 милиони долари.

Со ова, поп иконата го урна рекордот на најуспешна турнеја како соло изведувач, кој во 2006 година го постави токму таа.

Славната пејачка минатата година го издаде единаесетиот албум „Hard Candy“, а неодамна ја објави и новата песна „Celebration“ чија продукција ја работеше славниот британски диџеј Окенфолд.

Мадона Луиза Вероника Чичоне е родена 1958 година во Мичиген (САД) и освен пејачка таа е и текстописец, продуцент, актерка, писател, а од неодамна и моден дизајнер. Добитник е на многубројни награди и носител на многу рекорди во својата долгогодишна музичка кариера, меѓу кои и титулата на најпродаван женски уметник на сите времиња со проценети 250 милиони албуми ширум светот.

Концертот во Белград ќе се реализира во организација на продукциските куќи „State of Exit“ и „Live Nation“.