Прва ја започна приказната Тамара Тодевска, а ја продолжи Бојана Атанасовска. Првата поп-пејачка изјави дека никогаш не била дел од продукција Република, а втората за петочното издание на "Бекстејџ" раскажа дека ја напушта екипата на Врчак и компанија.

Бојана изјавува дека таа изгледа била преголем залак за Републиканците, не сакала нејзината кариера да биде во втор план, а таа да биде последна дупка на свиралото. Затоа, згодната Бојана ќе го раскине четиригодишниот договор, па среќата повторно ќе си ја проба самата како свој менаџер.


По само два месеци откако присуствуваше на гала промоцијата на Република, и заедно со Врчак, Адриан Гаџа, ДНК, Димитар Андоновски, Влатко Лозановски и Роберт Билбилов ја дуваше славеничката торта, Бојана им раскинува на големото друштво. Низ естрадните кругови се зборува дека Бојана сакала албум што поскоро, исто како и Тамара, но шефовите на Република на дамите им рекле да почекаат. Прв на списокот бил абумот на Врчак, па на ДНК, па деби цедето на Влатко Лозановски, па потоа ќе размислувале за проектите на двете пејачки. Поради тие причини, Тамара не го ни потпишала договорот, за кој изјави дека се советувала со нејзиниот адвокат, а Бојана се подготвува да го раскине.

И двете пејачки ја имаат истата мака: Газдите на ноќните клубови за настапи ги бараат на погрешна адреса: во Република, од каде што не им ги пренесуваат пораките. Со тоа им ги блокираат настапите од кои двете млади пејачки живеaат.