Мајкрософт мора да плати отштета од 290 милиони долари, а судијата кој ја донел одлуката ќе побара и да се запре продажбата на еден од главните производи на оваа компанија, „Вордот“.
Дури и големиот Мајкрософт може малку да се „сопне“ и тоа на еден од неговите најсилни производи, „Мајкрософт Ворд“.Софтверскиот џин мора да исплати 290 милиони американски долари поради користење на патентот на канадската компанија И4И.

Имено, станува збор за патент што се однесува на употребата на XML, јазик што овозможува форматирање на текстот и читање на датотеки во различни програми, а кој е составен дел од програмата „Ворд“ на Мајкрософт.

Одлуката за злоупотреба на патентот ја донел окружен судија од Тексас, кој по судски пат побарал и запирање на продажбата на „Вордот“.

Компанијата И4И во 1998 година го патентирала софтверот што се однесува на “манипулирање на архитектурата и содржината на документот посебно“, и го наведува XML како средство што на корисниците им овозможува форматирање на текстуалните документи.

Мајкрософт има 60 денови да ја исполни обврската наведена во обвинението, но од компанијата веќе најавиле жалба на пресудата.