Израелците деновиве ги зафати невообичаена возбуда предизвикана од извештаите дека во водите на Средоземеното Море во близина на Хаифа е забележана морска сирена.
Хаифската општина, Кирјат Јама, сериозно ги сфати овие извештаи, па понуди награда од милион долари на оној што ќе може да докаже дека во израелските води на Медитеранот живее ова митско суштество.

Портпаролот на општинската управа на Кирјат Јам, Нари Зилберман изјави дека во последниве неколку месеци имало 12 јавувања на лица кои тврделе дека виделе сирена.

- Многу луѓе велат дека се сигурни оти виделе сирена. Некои од нив воопшто не се поврзани меѓу себе, нагласи Зилберман.

Тој потенцира дека во сите случаи „очевидците“ тврдат оти ја виделе сирената при зајдисонце.

- Луѓето велат дека тоа е половина девојка, половина риба, која скока како делфин. Таа изведувала разни трикови, а потоа исчезнувала, додава Зилберман.

По објавувањето на ваквите тврдења илјадници љубопитни посетители се собраа во крајбрежјето на Хаифа, каде се наоѓа општината Кирјат Јам, со камери и фото-апарати во обид да ја „фатат“ сирената барем на видео снимка или фотографија.

Зилберман ги отфрла обвинувањата дека општината ја распишала наградата и ја поттикнала целата приказна за сирената, само за да привлече публицитет и повеќе туристи.

- Ако навистина има сирена, во Кирјат Јам ќе дојдат толку многу посетители и туристи, што ќе собереме повеќе од милион долари, нагласи Зилберман, одговарајќи на прашањато од каде и на општината пари за милионската награда.

Извор: Идивиди