“Духот на бабата Илонка“ во режија на Томислав Жаја, “Како бебе“ на Милчо Манчевски и “Пазар“ на Теона Стругар Митевска, се трите долгометражни филма кои се избрани на конкурсот во мај 2009, и за нив филмскиот фонд одвоил 500.000 евра.

“Духот на баба Илонка“ е во македонско-хрватска копродукција, детски филм посветен на ромската заедница. Поголемиот дел ќе се одигра во Македонија, а дел надвор од земјава. Во него се очекува улога и музика на Есма Реџепова, рече директорот на македонски филмски фонд, Дарко Башески.

Филмот “Како бебе“ на Милчо Манчевски е предвиден како трилогија па затоа тој побарал поголема сума на финансии за неговите наредни продолженија од филмот. А филмот “Пазар“ на Теона Стругар Митевска е планиран како научна фантастика.

“Фокусот на овој конкурс беше да се изберат повеќе кратки филмови. Од нив само еден е на автор кој зад себе има кариера, а тоа е Стефан Сидовски, кој сите филмови досега ги работел непрофесионално со сопствени средства и ова е прв негов краток филм поддржан со финансиски средства од страна на некаков фонд“, додаде Башески.

Mеѓу избраните кратки филмови е “Балон” во режија на Марија Апчевска кој добил поддршка од “Си синема нетворк“, кој е најскромен проект пријавен со буџет од само 6.000 евра, додека вкупно за сите кратки играни филмови од буџетот издвоени се 900.000 денари.

Од документарните избрани се шест филмови меѓу кои “Си барам невеста“ во режија на Марија Џиџева. Во филмот се зборува за нарушувањето на демократската структура, односно за ергените од пелагонискиот села, кои си бараат жени надвор од Македонија.

Од Анимираните избран е филмот “Гејм Овер” во режија на Никола Танчевски.

Изборот на филмовите е направен врз дискусија, односно пресудно било сценариото, продукцијата, продуцентот и искуството на авторот, изјави Башески.