Кралицата на ромската песна вели дека никогаш не би дала своја согласност нејзино дело да биде вклучено во таков контроверзен проект што ги исмева Ромите, како филмот Борат на Саша Барон Коен.

Кралицата на ромската песна Есма Реџепова воопшто и не поднела тужба против познатиот британски комичар Саша Барон Коен и ги демантира шпекулациите што се појавија во некои балкански медиуми дека деновиве го добила процесот и отштета од 26.000 евра – јавува Нова Македонија.

Причина за спорот меѓу Есма и контроверзниот Британец и предмет на наводната тужба е употребата на песната Чаје шукарије во неговиот филм Борат од 2006 година, искористена во повеќе сцени. Песната била снимена за холандската продукциска куќа Ворлд конекшн.

Не сум можела да добијам тужба, бидејќи никогаш не сум го тужела Борат. Точно е дека имав намера да го сторам тоа, но морав да се откажам од намерата, бидејќи продукцијата за која ја снимив песната дала дозвола темата да се употреби во филмот без да ме праша мене. Тие 26.000 евра што се споменуваат се парите што ги добила продукцијата за согласноста песната да биде дел од саундтракот на филмот - објаснува Есма.

Подоцна луѓето од Ворлд конекшн и ја исплатиле целата сума што ја добиле, откажувајќи се и од својот дел, а Есма не ги тужела ниту нив, иако имала право на тоа. Но, како што вели таа, целиот процес е завршен уште во март годинава, така што повторното отворање на случајот во јавноста е беспредметно. Во меѓувреме таа го раскинала договорот со Холанѓаните и потпишала со друга француска продукција.

И покрај спорот, името на познатата ромска пејачка е впишано меѓу авторите на саундтракот на Борат, а таа регуларно си ги прима тантиемите од неговото емитување, објавување дивиди и од објавувањето аудиоцеде со музиката од филмот. Сепак, кралицата на ромската песна вели дека никогаш не би дала своја согласност нејзино дело да биде вклучено во таков контроверзен проект што ги исмева Ромите.

Филмот ги исмева Ромите, Евреите и Американците. Никогаш не би се согласила да дадам свој придонес во таков проект, кој е против мојот народ. Тоа многу ме повредува - вели таа за Нова Македонија.

Есма најавува објавување два нови албуми за француската продукција, како и уште еден наменет за македонскиот пазар под етикетата на Мистер компани, кои на дискографскиот пазар се очекуваат наесен.