Тоше Проески

Иако речиси три години физички не е присутен меѓу нас, ликот и делото на Тоше Проески и натаму живее меѓу сите нас. По неодамнешното осветлување на манастирот „Свето Преображение” во Крушево, со полн интензитет продолжуваат активностите околу изградбата на спомен куќа.
Неговото вечно почивалиште секојдневно го посетуваат многубројни посетители од целиот свет кои сакаат да му оддадат почит.

На музички план, наскоро неговите обожаватели ќе бидат почестени со уште една необјавена песна. Станува збор за песната „Наслони главу” (Наслони ја главата). За неа веќе се снима и видео спот кој го работат две студија во Загреб. Според најавите, во него ќе биде нагласена големата хуманост и активностите кои Тоше ги имаше во таа насока. Во техничка смисла, видео спотот ќе претставува комбинација од анимација и компјутерска графика. Автор на песната „Наслони главу” е Сплиќанецот Ненад Нинчевиќ, фронтмен на некогаш многу популарната група Тути Фрути. Како автор, тој и претходно соработуваше со нашата ѕвезда. Ја напиша „Лагала нас мала” која Тоше во дует ја отпеа со Тони Цетински и е дел од албумот „По тебе”, објавен во 2005. година. Несомнено и новата песна која наскоро ќе биде промовирана ќе претставува уште еден хит кој долго време ќе се слуша и памети.