LAS VIAS DEL AMOR, Televisa|2002/03

Патишта на љубовта – Las vias del amor
Земја на потекло: Мексико
Година: 2002-2003
Епизоди: 220


Патишта на љубовта е маратонска мексиканска теленовела, која со голем успех се прикажуваше кај нас на А1 телевизија, иако е изгласана за најлоша теленовела за 2002 година во Мексико. Главната улога ја толкува актерката и пејачка Арасели Арамбула, која ги пее и песните во серијата.
Главната хероина на оваa приказна е сиромашната Перла, девојка која живее со своите родители и братот во малото гратче Веракруз. Работи како келнерка во ресторанот на моќниот дон Херонимо, сонува да заврши музичка академија и да стане пејачка. Дон Херонимо и неговиот син, пијаницата Енрике се смртно заљубени во Перла, па затоа богатиот дон Херонимо преку својот слуга Елмер го убива дечкото на Перла, Пако за да му биде ослободен патот до Перла. Перла не може да се помири со смртта на својот свршеник затоа што преку визиите коии често и се јавуваат, видела дека некој човек со тетоважа го убива Пако. Херонимо ја запросува Перла, но таа го одбива. Истовремено дознава дека нејзиниот сакан татко Фидел не и е биолошки татко и дека нејзините брат и мајка сакаат да се збогатат преку нејзината мажачка со стариот Херонимо. Елмер, слугата на дон Херонимо ја уценува Перла дека ќе го убие Фидел ако не се омажи за неговиот газда, па затоа Перла, приморана решава да го стори тоа. На првата брачна ноќ, Херонимо е убиен од својот пореметен син Енрике и за тоа убиство е обвинет Фидел, таткото на Перла. Перла со својот татко бега во Мексико. Таму, Перла ќе мора да се снаоѓа како знае и умее, да работи се и сешто за да успее. Во Мексико Сити живее Габриел Кесада со својата доминантна мајка Артемиса, која го обвинува за исчезнувањето на неговиот брат пред многу години. Привлечната Сандра е девојката на Габриел, но за неа се интересира и Адолфо, сопственик на дискотека, кој всушност е вистинскиот брат на Габриел. Габриел и Перла еден ден се запознаваат случајно и таа му предвидува дека ќе го најде својот брат. Перла и Габриел силно се вљубуваат еден во друг, али нивна голема препрека не претставува само Сандра, туку и лудата Соња, бивша девојка на Габриел. Во приказната се вплеткува и братот на Херонимо, уште помоќниот Себастијан Мендоза, кој прави се за да ги пронајде Перла и Фидел, мислејќи дека тие се вистинските убијци на неговиот брат. Себастијан не може ни да претпостави дека неговиот внук Енрике е виновен за убиството…Себастијан е лудо и посесивно вљубен во продавачката Лети, која живее во сиромашен кварт со синот Естебан и ќерката Росаура. Лети станува пријателка на Фидел и Перла и ги крие од злобниот Себастијан, но Перла не е само омразена од Себастијан. Таа до самиот крај ќе мора да се бори и против болеста на Фидел, против лудите Енрике и Соња за да конечно ја оствари својата љубов со Габриел.
Возбудлива приказна за авантурите на Перла, Габриел, Адолфо, Лети, Сандра, Себастијан со чии животи ќе управува судбината и ќе ги води на патиштата на љубовта.

Улоги: Арасели Арамбула, Хорхе Салинас, Габриел Сото, Енрике Роча, Даниела Ромо, Нуриа Багес, Абрахам Рамос, Марта Хулија, Бланка Санчез, Руди Касанова