O CLONE, Rede Globo|2001/2

Клон е најпопуларната бразилска теленовела, снимена во 2001 година според сценариото на Глорија Перез. Снимена е на повеќе локации како што се Рио де Жанеиро и Мароко. Серијата обработува низа на современи проблеми и ни дава паралела меѓу христијанството и исламот како религии, па затоа и достигна неверојатен успех во целиот свет, па и кај нас кога беше прикажувана во ударен термин. Во Бразил првата епизода достигна гледаност од 48% , а последната епизода ја гледале 62% од населението. Низ серијата не водеше и одличната оригинална музика и ориенталните танци.

Клон – O Clone
Земја на потекло: Бразил
Година: 2001-2002
Епизоди: 250

Во Мароко во 80-те години на минатиот век започнува оваа голема приказна полна со дилеми, културолошки и религиозни разлики, корупција на етиката во име на науката, како и прашањето за бракот од љубов или интерес. Многу млада, муслиманката Жаде останува сираче и се враќа во Мароко кај својот чичко Али, кој живее во еден храм со своите жени, домаќинката Зорајде и другата внука Латифа. Жаде ќе мора да се соочи со ригорозните муслимански правила и принципи, но во Мароко ќе го запознае и младиот Лукас Ферас, католик од Бразил кој дошол на одмор во Африка. Меѓу нив се јавува вистинска и голема љубов, која во текот на целата новела ќе биде спречена и забранета поради различните култури и религии. Чичко Али ја приморува Жаде да го следи она што и го налага Куранот и ќе го договори нејзиниот брак со Саид, и покрај противењето на Жаде да не се мажи со човек кого не го сака. Од друга страна, умира братот близнак на Лукас, Џого во страшна експлозија со хеликоптер во Бразил откако ќе биде со Лукас на одмор во Африка. Таткото на Лукас и Џого, богатиот Леонид чувствува голема вина поради кавгата со Џого пред смртта поради Ивет, свршеницата на Леонид која имала авантура со Џого. Леонид не ни сака да чуе дека Лукас ќе се жени со некоја муслиманка од странство, па од тој момент започнува трагичната судбина за Жаде и Лукас, приморани да се откажат од своите чувства во име на религиозните правила кои со раѓање ни се наметнуваат. Срамежливиот и повлечен Лукас, и покрај сонот да стане музичар, ќе прифати да се грижи за компанијата на својот татко и со тоа да ја напушти Жаде, неговата голема љубов. Лукас се жени со префинетата Маиза, а Жаде по низа неволји и одбивања, се мажи за муслиманот Саид. Оној кој никогаш не се помирува со смртта на Џого е неговиот кум, научникот Албиери решава да направи човечки КЛОН и да го врати Џого во живот. Затоа ја искористува Деуза, жена која сака вештачи да се оплоди и користејќи ги научните вештини, Албиери го создава Лео, клонот на Лукас. По многу години поминати во брак без љубов, Жаде ја има ќерката Хатиџа, а Лукас и Маиза ја имаат ќерката Мел, која поради недоволната грижа и внимание од родителите, се предава на дрогата и станува зависничка. И конечно, во Бразил се преселуваат Саид и Жаде со ќерката и по толку години, Жаде и Лукас повторно се среќаваат. Жаде е разочарана затоа што во цврстиот и ладен човек не ја гледа нејзината младешка љубов, оној Лукас во кого се вљубила. И тогаш, Жаде го запознава Лео, клонот на Лукас во кого го гледа човекот во кој пред многу години се вљуби. Така се добива интересен љубовен триаголник во кој Лукас ќе мора да се бори против самиот себе. Лукас ќе мора да ги решава семејните проблеми со Маиза и Мел, а Жаде ќе се справува со втората жена на Саид, па потоа и по втор пат ќе се омажи со муслиманот Зеин... Интересна и долга ќе стане приказната за забранетата љубов Жаде и Лукас, приказната за дрогата, за вечните дилеми околу науката и религијата...

Улоги: Џована Антонели, Мурило Беницио, Вера Фишер, Режиналдо Фариас, Хука де Оливеира, Стенио Гарсија, Даниела Ескобар, Адриана Леса, Дебора Фалабела

Имам екстра новости,Клон ќе оди на Алсат секој работен ден од 13 00 часот со македонски превод
Значи 13 00 мк титил
18 30 албански