HILDA FURACAO, Rede Globo|1998

Ураганот Хилда – Hilda Furacao
Земја на потекло: Бразил
Година: 1998
Епизоди: 25


Ураганот Хилда е бразилска мини серија, снимена од најпознатата бразилска продукција Глобо, а кај нас се прикажуваше своевремено на Канал 5 телевизија.
Малтуш, Арамел и Роберто се тројца млади момчиња кои целото детство го поминале заедно во местото Santana dos ferros, па затоа и ги нарекуваат Тројцата мускетари. По завршувањето на гимназијата, заминуваат со своите куфери кон градот Бело Хоризонте. Малтуш сака да стане свештеник и ќе се зареди во редовите на Доминиканците во манастирот. Арамел сака да стане глумец во холивудските филмови, а Роберто сонува да биде предводник на револуцијата која ќе го промени светот.
На другиот крај на градот, се запознаваме со младата и убава Хилда Милер, која треба да се мажи, но пред самото венчање, се предомислува. Го напушта родителскиот дом и оди во зоната Бохемија во Бело Хоризонте. Во бела венчаница, влегува во борделот во кој живеат проститутки, трансвестити, луѓе од најдолните слоеви, и така влегува во соба 304 која станува нејзина соба. Набрзо се впушта во тој опасен свет, станува најпознатата проститутка во градот – фатална жена, без срам и достоинство, но со стил, па така нејзиниот пријател Цинтура Фина ја нарекува Ураганот Хилда. Но, Хилда постојано ќе се сеќава на нејзината посета кај гатачката мадам Жанет, која и ја открила иднината, дека ќе се заљуби во човекот кој ќе ја најде нејзината изгубена кондура. Мисијата на фрај Малтуш ќе биде да ги протера злите сили од фаталната Хилда. Но, работите додатно ќе се комплицираат кога Хилда сред една ноќ ќе ја изгуби својата кондура, а кондурата ќе ја пронајде ....Малтуш. Хилда постојано ќе мисли на Малтуш, за кој љубовта е забранета и грешна мисла. Вистинските заплети и пресврти настапуваат откако општествените институции на гратчето Зона Бохемија, претставени преку Лоло Вентура ќе сакаат со закон да го забранат и укинат борделот како вид на забава и ширење на неморал, а против таквата одлука остро ќе застанат луѓето од борделот на чело со Цинтура Фина и Мариа Томба-Хомем.

Улоги: Ана Паула Аросио, Родриго Санторо, Дантон Мело, Ева Тодор, Рохерио Кардоса, Пауло Аутран, Тијаго Ласерда, Дебора Дуарте