PERCY JACKSON AND THE OLYMPIANS: The Lighting Thief | 2010

Percy Jackson & the Olympians: The Lighting Thief - Перси Џексон и Олимпијците: Крадецот на молњи е фантастичен филм базиран на серијалот романи Перси Џексон и Олимпијците од Рик Роидан. Имено, писателот Рик Роидан претходно работејќи како професор по грчка митологија во основно училиште сакајќи да ги оживее приказните кои му ги раскажувал на својот син кој боледува од дислексија и аутизам решил да напише серијал романи за момче по име Перси Џексон, кое е во слична ситуација како неговиот син. Книгите имаат постигнато огромен успех низ светот особено помеѓу помладата популација. Серијалот е често сметан како имитација на Хари Потер но самиот писател фан на младиот волшебник, тврди дека не е така.

Филмот како прв дел од планираниот филмски серијал излезе оваа година во февруари, а кај нас кон крајот на март. Режиран е од популарниот режисер Крис Колумбус, кој ги режираше и првите два дела од Хари Потер серијалот. Актерската екипа е нова, сочинета од релативно млади актери, но се појавуваат и популарни холивудски лица. Во главно филмот обработува елементи од грчката митологија, внесувајќи митски ликови и суштества.

Синопсис:
Перси Џексон е дислексично и хиперактивно 14-годишно момче (12 годишно во романот) кое открива дека е син на грчкиот бог на морињата Посејдон. Ова му го открива неговиот најдобар пријател Гровер кој е всушност сатир (полујарец-получовек). Перси е пратен во летен камп по име Полукрвност (Camp Half-Blood) каде дознава дека е деми-бог (полубог). Имено, полубогови се луѓе кои се плод на човек и бог, но поради несакани ефекти главниот бог Зевс донесува закон да боговите никогаш не се приближат до своите деца.

Во меѓувреме во кампот Перси ја запознава опасната Анабет. ќерка на Атена, божицата на мудроста и Лук, постар посетител, син на Хермес, бог на патувачите, кражбата, спортот и гласник на боговите. Причината поради која Перси открива за сите овие нешта е бидејќи е лажно обвинет дека ја украл главната молња на Зевс. Набргу богот на подземјето Ад му кажува на Перси дека ако сака да ја спаси мајка му (која е претходно грабната од Минотаурот) мора да му ја донесе молњата. Перси знаејќи дека кај него не е молњата решава сепак да оди и да ја каже вистината но за да воопшто излезе од подземјето потребни му се три волшебни бисери кои ќе го телепортираат надвор од подземјето. Затоа тој заедно со Анабет и Гровер одат на незаборавна авантура во спасување на мајка му на Перси, пронаоѓање на бисерите и борба против разни митолошки суштества.

Образложено е дека боговите постоеле постојано, но го менувале местото на живење од планината Олимп на други места според тоа во која држава луѓето верувале во нив. Овојпат се во САД и живеаат на врвот на Емпајр Стејт Билдинг. Хиперактивноста и дисклексијата на Перси се објаснети дека неговиот мозок е програмиран да чита старогрчки и да се бори.