Аманет, Сител | 2009

МАКЕДОНСКАТА ЕСТРАДА ВО ШПАНСКА СЕРИЈА

Боки 13-ка е лошата мајка на Бојана

Завчера започна снимањето на серијата "Аманет", пародија на јужноамериканските сапуници, во која ќе глумат многу наши естрадни фаци

Поп-пејачката Бојана Атанасовска е богата наследничка што живее на огромен ранч. За нејзиното наследство се борат двајца мажи, а од нив ја штити мајката на Бојана Боки 13-ка. На крајот излегува дека Боки е лошата мајка. Тој ќе се обиде да ја отруе Бојана за да и ги ќари парите. Во целата приказна подоцна влетуваат и Тони Зен, дуото "Некст тајм", Јован Јованов, Елвир Мекиќ, раперот Слаткар....
Македонските естрадни личности заеднички се вплеткани во серијата "Аманет", која ќе се емитува секој петок во состав на естрадниот магазин "Бекстејџ" на "Сител" ТВ. Уредничката на емисијата Снежана Велков која, заедно со нејзината екипа, е сценарист и режисер на серијата, вели дека публиката ќе ужива во јужноамериканска сапуница на македонски начин. Завчера на Хиподромот во Волково се снимаше првата епизода, во која глумеа поп-пејачката Бојана Атанасовска, модниот менаџер Мики Црнокрак, шоуменот Бојан 13-ка, менаџерот Кристијан Стефановски, водителот Миро Кацаров и манекенката и водителка Марјана Станојковска.
"Кристијан сака да ја фати богаташката Бојана, а во Кристијан е вљубена Марјана. Бојан 13-ка ја глуми мајката на Бојана, која на крајот ќе се обиде да и стави отров во чајот, со цел целото богатсво да го добие таа. Во втората епизода ќе се појави и Тони Зен, кој ќе се вљуби во сестрата близначка на Бојана, која работи во циркус. Планираме во овој проект да ангажираме добар дел од македонската естрада. Засега е сигурно учеството на 'Некст тајм', Јован Јованов, Елвир Мекиќ, Слаткар, Тони Зен и на Џаро, а понатаму ќе ангажираме и други наши редовни соработници", ни раскажа Снежана.
Интересно е што серијата ќе биде синхронизирана, естрадните личности ќе се појавуваат само како ликови, а нивните гласови ќе ги синхронизираат водители и актери. Според Велков, целта на "Аманет" е да ги насмее и забавува гледачите, а естрадата да ја видиме во малку поинакво светло. (М.Џ.)