Студентите на Музичка академија од Скопје, заедно со неколку нивни професори, вчера ја однесоа дипломата на Тоше Проески во Крушево. Дипломата деновиве беше благословена од световни лица.

Направена е од метал и на неа е испишано: Република Македонија, Универзитет Св. Кирил и Методи и Факултет за музичка уметност - Скопје му доделува Диплома на Тодор Проески за посебни заслуги во афирмацијата на македонската вокална интерпретација, 28.8.2009 година, професор декан м-р. Евуша Елезовиќ. Направени се две скапоцени копии, од кои едната му е предадена на семејството Проески, а другата е однесена на вечното почивалиште на Тоше.

Во оваа група студенти, кои беа во Крушево, се застапени лица од прва до четврта година на факултетот, од сите четири класи по соло-пеење, од катедрата на Билјана Јакимовска - Јовановска, професорката на Тоше, како и од катедрите на професорите Марија Муратовска - Наумовска, Весна Гиновска - Илкова и Славица Галиќ - Петровска. Во Крушево на групата и се приклучи и професорот Велко Тодевски.

Студентите овој чин го изведоа најдостоинствено и најкултурно. Нивната посета опфати оддавање почит на неговиот вечен дом и посета на манастирот Свето Преображение. На неколку локации – на спортското игралиште, на крстот, во манастирот, и на игралиштето на Тоше кое градските власти го урнаа, тивко беа испеани химната на Република Македонија, навивачката химна Македонија навива за вас и Цреша.

Посетата беше во организација на ФМУ и продеканот за настава при Академијата и вонреден професор, Снежана Димчевска, која соработуваше со Тоше за време на неговото подготвување на операта професор Деспина и мистер Докс на професорот Димитрие Бужаровски.

Меѓу присутните беше и поп-пејачот Ламбе Алабаковски, како и уметникот Ставре Димитровски - Страдин, кој на семејството Проески му подари портретот на Тоше со апостолите...