"Само што слетавме на Кос и таму зедовме уште неколку патници, а механичарите нешто веќе поправаа. Сметавме дека ако и ние го пријавиме ова, никогаш нема да стигнеме дома" објаснува патникот зошто не го пријавиле дефектот на стјуардесата

БЕЛГРАД (Блиц) - Авионите на државниот српски авиопревозник "ЈАТ ервејз"се толку дотраени што во текот на летот од нив паѓаат штрафови. Иако звучи како шега, вистина е дека патниците на летот Крит-Кос-Белград неодамна биле запрепастени кога низ прозорецот од нивната страна виделе извлечени штрафови кои само што не паднале.
Се работи за "боингот" на српскиот државен превозник кој на 14 август леташе од грчките острови за Белград. На фотографиите кои читателите на "Блиц" ги доставија во редакцијата на српскиот весник, јасно се гледа како кога авионот полетува штрафовите на левото крило се извлекуваат, а еден веќе фали. Од оваа гледна точка нивната загриженост е сосема оправдана, бидејќи јасно се гледа дека крилото на авионот од летот "ЈУ 5245" само што не останало без спојка.
"Еден штраф веќе фалеше, другиот само што не падна" раскажува за "Блиц" загрижен патник од летот 5245. На прашањето дали го пријавиле дефектот на стјуардесата, тој одговара дека не, бидејќи само сакале што побрзо да се вратат дома.
"Само што слетавме на Кос и таму зедовме уште неколку патници, а механичарите нешто веќе поправаа. Сметавме дека ако и ние го пријавиме ова, никогаш нема да стигнеме дома" објаснува патникот.
Од "ЈАТ" велат дека тоа што се одвртил штраф од крилото на авионот, според стручната служба на државниот авиопревозник, не ја загрозувало безбедноста на авионот и летањето. Од компанијата сепак признаваат дека е неопходно да се обнови флотата, бидејќи како што велат од таму "одржувањето на авионите е исклучително скапо токму поради тоа што се стари". Во Информативната служба на "ЈАТ" тврдат дека и понатаму се безбедна авиокомпанија и дека сите авиони со кои летаат се технички исправни.