EL AMOR NO TIENE PRECIO, Televisa|2005/06

Љубовта нема цена е мексиканска теленовела, продуцирана од Телевиса во соработка со Фоновидео, а главните улоги ги толкуваат Сузана Гонзалес и Виктор Нориега. Серијата е римејк на венецуелската "Regina Carbonell" и "Pobre señorita Limantour" (каде Талија ја играла главната улога). Главниот продуцент е Alfredo Shwarz , но и познатиот Салвадор Мехија е еден од главните режисери. Навловната песна "El amor no tiene precio" ја изведува Ivan.
Серијата кај нас се прикажуваше на Алсат Телевисија, а во светот достигна дебакл поради невидено апсурдното сценарио, па така во Хрватска пред крајот беше и прекината со емитување.


ЉУБОВТА НЕМА ЦЕНА - EL AMOR NO TIENE PRECIO
Период на прикажување: 26 Септември 2005 - 20 Октомври 2006
Епизоди: 280


Синопсис:
Марија Лиз живее во сиромашен мексикански кварт со дедото кој ја посвоил - Хенри Алехандер. Марија Лиз ја загубила својата мајка на 12-годишна возраст кога таа умрела од длабока депресија поради напуштањето од страна на сопругот, додека пак Хенри Алехандер загубил многу пари на берзата во младоста, а смртта на неговата ќерка му го пореметила и умот. Марија Лиз живее со сонот да заврши студии по медицина, а работи како медицинска сестра Таа е во врска со себичниот и амбициозен Марсело, кој студира инженерство и се надева дека еден ден ќе го напушти тој смрдлив кварт во потрага по добра работа, напуштајќи ги родителите и Марија Лиз кои многу направиле за него.
Од друга страна, во богатиот дел од градот живее Себастијан со неговата мајка, доња Лукреција. Таа ужива висок углед во општеството благодарение на политичката кариера и наследството од сопругот. Себастијан работи во една градежна компанија, каде како асистент се вработува и Марсело. Од тој момент, Марсело ќе прави се што е во негова моќ за да му ја земе позицијата на Себастијан во компанијата, а воедно да му ја превземе и девојката на Себастијан - Арасели, која е ќерка на сопственикот на компанијата.
Првата средба на Себастијан и Марија Лиз е конфилктна кога Себастијан ќе донесе повреден работник во болницата каде Марија Лиз работи како медицинска сестра. Себастијан заклучува дека Марија Лиз е вредна и добра девојка и затоа ја вработува како негувателка на неговата мајка во нивната богата куќа. Постепено, Себастијан и Марија Лиз се вљубуваат, но против нивната љубов пред застанува доња Лукреција. Таа сака економска сигурност за нејзиниот син и идеална шанса за синот гледа во женачката со богатата и покварена Арасели. Против невината Марија Лиз застанува и Арасели откако ќе увиди дека постои хемија меѓу болничарката и нејзиното момче, но против Марија Лиз е и Росалија, која е вљубена во докторот кој ја сака Марија Лиз.
Марија Лиз и Себастијан решаваат да се борат за својата љубов, давајќи им на знаење на непријателите дека љубовта нема цена, а вистинските заплети во нивните животи доаѓаат откако ќе се венчаат и Марија Лиз ќе открие дека е бремена од Себастијан.

Улоги: Виктор Нориега, Сузана Гонзалес, Сузана Досамантес, Еухенија Кадуро, Роберто Вендер, Виктор Гонзалес, Алехандро Авила, Кати Барбери, Енрике Родригез